Landsliðsmarkvörður númer eitt, Hannes Þór Halldórsson stóð í marki Randers þegar liðið fékk skell gegn FCK frá Kaupmannahöfn í dönsku úrvalsdeildinni í gær, laugardag.

Leikurinn fór fram á þjóðarleikvangi Dana, Parken og var það FCK sem braut ísinn á 25. mínútu þegar Pieros Soteriou skoraði. Viktor Fischer, sem kom til FCK á dögunum, bætti við öðru marki stuttu síðar og fljótlega var staðan orðin 4-0 fyrir heimamenn.

Randers minnkaði muninn fyrir hálfleik en lengra komust þeir ekki. Í staðinn bætti FCK við einu marki í seinni hálfleiknum og urðu lokatölurnar 5-1 fyrir Kaupmannahafnarliðið.

Þetta var fyrsti leikur liðanna eftir vetrarhlé. Randers, sem rak þjálfara sinn á dögunum situr á botninum á meðan FCK er í fjórða sætinu með 29 stig.