Ronny Deila, þjálfari Celtic, þekkir vel til norska undrabarnsins en hann stýrði Stromsgödset í norska boltanum þegar Ödegaard var að koma fram á sjónarsviðið og það var Deila sem gaf honum fyrst tækifæri með aðalliði félagsins.

Ödegaard varð svo einn eftirsóttasti leikmaður heims og skrifaði undir samning við Real Madrid í byrjun þessa árs.

Hann spilaði aðallega með B-liði Real Madrid á síðustu leiktíð en æfði með aðalliðinu og varð svo yngsti leikmaðurinn til að spila fyrir aðallið Real Madrid þegar honum var skipt inn á fyrir Cristiano Ronaldo í lokaleik tímabilsins.

Nú er talið að Real Madrid horfi til þess að þessi 16 ára Norðmaður þurfi að fá alvöru spilatíma, eitthvað sem Celtic ætti að geta veitt honum.

Fari svo að Ödegaard gangi í raðir Celtic gætu íslenskir knattspyrnuáhugamenn fengið að fylgjast með honum á Stjörnuvellinum þann 22.júlí næstkomandi en Celtic dróst gegn Stjörnunni í forkeppni Meistaradeildarinnar.