DInamo Zagreb hefur staðfest að leikmaður liðsins, Arijan Ademi, hafi fallið á lyfjaprófi eftir sigurleikinn á Arsenal í Meistaradeild Evrópu á dögunum.
Þessi 24 ára gamli miðjumaður gæti átt yfir höfði sér langt keppnisbann en UEFA hefur ekki gefið út tilkynningu vegna málsins.
Ademi spilaði allan leikinn á miðju liðsins í leiknum gegn Arsenal sem endaði með óvæntum 2-1 sigri króatíska liðsins.
„Okkur hefur borist niðurstaðan úr lyfjaprófi sem var tekið eftir leik gegn Arsenal í fyrstu umferð riðlakeppni Meistaradeildar Evrópu. Leikmaður okkar, Arijan Ademi, féll á prófinu og hefur UEFA höfðað mál á hendur honum. Samkvæmt reglum UEFA hefur Dinamo ekki heimild til að fjalla frekar um málið fyrr en niðurstöður úr B-sýni hafa borist," er meðal þess sem segir í yfirlýsingu Dinamo Zagreb.
Athugasemdir