Birkir Már Sævarsson.
Birkir Már Sævarsson, hægri bakvörður íslenska landsliðsins, var svekktur með að missa niður leikinn gegn Tyrklandi í 1-0 tap undir lokin í kvöld.
„Þetta var mjög svekkjandi. Í fyrsta lagi fannst okkur þetta ekki vera aukaspyrna og í öðru lagi var þetta frábær aukaspyrna. Þeir taka smá sénsa eftir að þeir missa mann út af og frétta að þeir geta farið beint áfram, en þeir skapa svosum ekki neitt og ef við hefðum ekki fengið þetta mark á okkur hefðum við kannski getað laumað inn einu" sagði Birkir Már við Fótbolta.net.
Hann viðurkennir að hann hafi notið stemningarinnar á Torku Arena.
„Þetta var alveg frábært, þetta voru þvílík læti og maður er enn með pínu píp í eyrunum. Þetta kemst nálægt því í Stokkhólmi þegar við erum að spila nágrannaslagina en það eru aðeins meiri læti hérna," sagði Birkir Már.
„Auðvitað hefðum við viljað enda þetta betur, við höfum ekki unnið leik síðustu þrjá leiki og hefðum viljað enda miklu betur, en auðvitað erum við mjög glaðir að vera komnir til Frakklands."
Athugasemdir
