Lestu um leikinn: Tyrkland 1 -  0 Ísland

„Þetta var engin aukaspyrna. Það eru allir sammála um það og ég held að dómarinn viti það líka sjálfur. Þegar maður er með ítalskan dómara þá veit maður aldrei hvað gerist," sagði Kári við Fótbolta.net eftir leik.

Tyrkir höfðu misst Gökhan Töre af velli með rauða spjaldið áður en sigurmarkið kom.

„Þegar að hann var rekinn út af þá áttaði hann (dómarinn) sig á því að hann gæti verið í verseni ef að þetta myndi enda með jafntefli eða ef við hefðum unnið. Hann þurfti einhvernegin að bæta það upp."

Kári fannst Ísland ekki eiga skilið að tapa leiknum. „Við vorum með fulla stjórn á þessum leik. Þeir voru ekki að fara að skora þó við myndum spila í 180 mínútur. Þeir fá þessa aukaspyrnu og eru með frábæra spyrnumenn og skora," sagði Kári en gríðarlegur hávaði var á leikvanginum í Konya í kvöld.

„Ég hef ekki spilað í svona miklum hávaða. Þetta er mjög furðulegt. Það er verið að blístra allan tímann og búa til hávaða frekar en að búa til söngva."

Hér að ofan má sjá viðtalið í heild sinni.