Ronaldo átti viðburðaríkar lokamínútur í leiknum í gær. Hann kom Real Madrid yfir á 80. mínútu og fékk gula spjaldið fyrir að rífa sig úr að ofan þegar hann fagnaði. Tveimur mínútum síðar fékk hann annað gult spjald og rautt fyrir leikaraskap.

Eftir rauða spjaldið ýtti Ronaldo í bakið á De Burgos Bengoetxea dómara leiksins. Spænskir fjölmiðlar segja að slíkt þýði refsingu upp á fjóra til tólf leiki.

Ronaldo verður í banni í síðari leiknum gegn Barcelona í vikunni og nú er útlit fyrir að hann missi einnig af fyrstu leikjum Real Madrid í spænsku úrvalsdeildinni.

Aganefnd spænska knattspyrnusambandsins kemur saman í vikunni og þá kemur í ljós hversu langt bann Ronaldo fær.

Hér að neðan má sjá atvikið.