Abel Dhaira, landsliðsmarkvörður Úganda, heldur áfram að verja mark ÍBV en Guðjón Orri Sigurjónsson veitir honum samkeppni og er væntanlega ákveðinn í að hirða stöðuna.

Benedikt Októ Bjarnason kom frá Fram síðastliðið haust og hann hefur eignað sér stöðu hægri bakvarðar í Eyjum. Andri Ólafsson mætti heim til Eyja síðastliðið sumar og hann verður með fyrirliðabandið í sumar. Avni Pepa, landsliðsmaður Kosovo, verður með honum í hjarta varnarinnar en hann kom til Eyja í vetur. Hinn norski Tom Even Skogsrud verður í vinstri bakverði en Matt Garner verður lítið með í sumar eftir að hafa fótbrotnað illa undir lok síðasta tímabils. Hinn ungi Jón Ingason gæti einnig spilað í vinstri bakverði.

Eyjamenn binda miklar vonir við hollenska miðjumannin Mees Siers en líklegt er að Gunnar Þorsteinsson verði við hlið hans. Hafsteinn Briem kemur þó einnig sterklega til greina í byrjunarliðið. Fremst á miðjunni koma nokkrir leikmenn til greina. Hinn síungi Ian Jeffs verður í banni í fyrsta leik og Bjarni Gunnarsson byrjar því líklega. Gauti Þorvarðarson kemur líka til greina en hefur verið iðinn við kolann að undanförnu eftir að hafa raðað inn mörkum með KFS í fyrra.

Aron Bjarnason og Víðir Þorvarðarson eru leiknir kantmenn sem gætu sprungið út í sumar. Báðir með mikla hæfileika. Jonathan Glenn raðaði inn mörkum í fyrrasumar eftir erfiða byrjun. Glenn krækti í silfurskóinn og Eyjamenn binda vonir við að hann verði í sama ham í sumar.