Hollenska fótboltafélagið Vitesse Arnhem fékk dæmd 18 mínusstig úr hollensku deildinni vegna viðskiptatengsla við rússneska ólígarkann Roman Abramovich, sem er fyrrum eigandi Chelsea.
Vitesse vermdi botnsæti efstu deildarinnar í Hollandi fyrir ákvörðun hollenska fótboltasambandsins en liðið er núna í langneðsta sæti með -1 stig í heildina, og er þegar fallið úr deildinni stærðfræðilega séð.
Þetta er mikill skellur fyrir félagið sem hefur verið í efstu deild í Hollandi síðustu 35 ár í röð.
Vitesse hefur ákveðið að áfrýja ekki ákvörðun fótboltasambandsins af ótta við að missa réttinn til að keppa í hollenska fótboltapýramídanum.
Samband Vitesse við Abramovich var mjög mikið þegar Rússinn átti Chelsea og var iðinn við að senda unga og efnilega leikmenn til Vitesse á lánssamningum.
Abramovich, sem er tengdur Vladimir Putin Rússlandsforseta, var neyddur til að selja enska úrvalsdeildarfélagið eftir innrás Rússlandshers inn í Úkraínu í febrúar 2022.
Það var enska blaðið Guardian sem átti meginþátt í því að koma upp um falin viðskiptatengsl Abramovich við Vitesse.
Félagið hefur beðist afsökunar á framferði sínu og þakkar fyrir að fá að halda keppnisleyfinu.
Athugasemdir