Hetja Manchester City í enska bikarnum, Bernardo Silva, tekur undir með stjóra sínum, Pep Guardiola, varðandi leikjaálag og segir það ekki sanngjarnt gagnvart liðinu.
Bernardo sá til þess að Man City færi í úrslit annað árið í röð með marki undir lok leiks í 1-0 sigrinum gegn Chelsea í gær.
Eftir leikinn kvartaði Pep Guardiola yfir því að liðið hafi þurft að spila á laugardegi, aðeins þremur dögum eftir að hafa spilað 120 mínútur gegn Real Madrid í Meistaradeildinni.
Chelsea, Coventry City og Manchester United fengu öll næga hvíld fyrir undanúrslitin og óskaði Guardiola eftir því að Man City fengi að spila á sunnudeginum frekar.
Bernardo tekur í sama streng og kallar eftir breytingum.
„Líkamlega vorum við svo þreyttir. Við fengum tvo daga í hvíld á meðan Chelsea fékk fimm eða sex daga. Það er ekki sanngjarnt þegar þú hugsar út í það að við spiluðum 120 mínútur fyrir nokkrum dögum á meðan Chelsea eyddi fimm dögum heima til að hugsa um leikinn,“ sagði Bernando á heimasíðu Man City.
Athugasemdir