Dragan Kazic, þjálfari Víkings R. í Pepsi-deild karla, var ágætlega sáttur með sína menn þrátt fyrir 3-2 tap gegn Breiðablik. Líkur eru á því að hann þjálfi liðið út tímabilið.
Milos Milojevic hætti með liðið á föstudag og var því Kazic við stjórnvölin í dag en hann var aðstoðarþjálfari Milos hjá liðinu áður.
Hrvoje Tokic kom Blikum yfir í leiknum áður en Gunnlaugur Fannar Guðmundsson jafnaði metin með skalla. Davíð Kristján Ólafsson kom Blikum aftur yfir með laglegu marki úr teignum áður en Michee Efete skoraði með skalla. Dofri Snorrason minnkaði muninn undir lok leiks.
„Þetta var mjög mikilvægur leikur fyrir bæði lið. Við vorum hræddir við breytingarnar hjá þeim, það er mikill hraði í liðinu. Við fundum ekki lausnina í fyrri hálfleik við þessu vandamáli og í síðari hálfleik klára þeir okkur á fimm mínútna kafla og við fáum tvö mörk á okkur úr föstum leikatriðum," sagði Dragan við fjölmiðla.
„Við skorum reyndar líka tvö mörk. Svona er fótboltinn stundum en ég er mjög ánægður með síðari hálfleikinn. Breiðablik stýrði eiginlega fyrri hálfleiknum og við gáfum þeim of mikið pláss."
Víkingar léku 3-5-2 leikkerfið í dag en þeir spiluðu það gegn Haukum í bikarnum og hafa æft það í vetur.
„Við höfum æft þetta leikkerfi og við spiluðum sama kerfi gegn Haukum. Haukar er kannski ekki lið eins og Breiðablik og í dag náðum við ekki að skapa færi eins og við gerðum í bikarleiknum."
Róbert Örn Óskarsson og Geoffrey Castillion voru fjarverandi í dag vegna meiðsla.
„Sum lið eru með 20 leikmenn, ekki bara tvo leikmenn. Við verðum að undirbúa okkur að geta ekki notað alla leikmenn, við erum stundum með menn í banni, í meiðslum og hver einasti leikmaður á bekknum getur gegn mikilvægu hlutverki."
Orðrómur er uppi um að Kazic stýri liðinu út tímabilið en hann vildi ekki staðfesta neitt. Hann hefur þó mikinn áhuga á að taka við stöðunni en samningur hans rennur út í október.
„Þetta er spurning fyrir stjórnina. Ég hér til að hjálpa og ég er með samning út október. Þeir eru sáttir við okkar starf en ef það verður ekki af þessu þá er það allt í góðu. Það skiptir engu máli hvort einhver kemur eða ekki, sá sem verður í starfinu mun gera það besta til að koma liðinu á réttan stall. Skiptir ekki máli hvaða lið, í hvaða deild eða í hvaða landi það er, maður reynir sitt besta," sagði Kazic.
Athugasemdir