Viðar Örn er markahæstur í Svíþjóð en hann kemur inn í hópinn á nýjan leik eftir að hafa ekki verið með á EM í Frakklandi. „Hann er í toppstandi. Það lekur allt inn hjá honum og við vonumt til að geta yfirfært það í landsliðið okkar," sagði Heimir.

Eftir gott gengi á EM er komið að næsta verkefni hjá landsliðinu sem er undankeppni HM 2018.

„Velgengni er ekki endastöð, hún er stanslaust ferðalag í rétta átt. Við þurfum að einbeita okkur að því að koma mönnum andlega í réttan gír. Við vorum ákaflega vel stemmdir andlega í öllu mótinu í Frakklandi og við þurfum að reyna að endurskapa það andrúmsloft aftur."

Heimir segir mikilvægt að ná góðri byrjun í riðlinum en framundan eru fjórir leikir hjá íslenska landsliðinu á þessu ári.

„Í síðustu tveimur keppnum höfum við unnið fyrsta leik og það skiptir gríðarlega miklu máli að byrja vel. Þessi riðill er jafn og hvert einasta stig og jafnvel hvert einasta mark, skiptir máli. Það þarf að ná fullri einbeitingu og spila okkar besta leik."

Hér að ofan má sjá viðtalið í heild sinni en þar ræðir Heimir meðal annars félagaskipti hja landsliðsmönnum í sumar.