Rúnar Alex Rúnarsson, markvörður Nordsjælland og íslenska landsliðinu, segist ætla að veita Hannesi Þór Halldórssyni harða samkeppni á æfingum fram að HM í Rússlandi.
Hannes er aðalmarkvörður íslenska landsliðsins en Rúnar ætlar að reyna að gera hann ennþá betri.
Hannes er aðalmarkvörður íslenska landsliðsins en Rúnar ætlar að reyna að gera hann ennþá betri.
„Ég fer aðallega með það hugarfar inn í mótið að ég ætla að gera Hannes ennþá betri. Með því að vera góður sjálfur ætla ég að láta hann æfa betur og láta hann spila betur í leikjum," sagði Rúnar Alex í KR Podcastinu sem kom út í dag.
Rúnar Alex vonast til að fá að sanna sig í komandi vináttuleikjum gegn Noregi og Gana.
„Ég vona að ég fái einhverjar mínútur og pressi þá á Hannes og Heimi. Ef þeir vilja spila mér þá er ég meira en til í það. Annars ætla ég að pressa á Hannes."
Rúnar er í stuttu fríi eftir tímabilið í Danmörku en hann hefur æfingar með íslenska landsliðinu í næstu viku. Í vetur var Rúnar Alex lykilmaður hjá Nordsjælland sem endaði í 3. sæti í dönsku úrvalsdeildinni. Hann segist vera klár í að taka næstu skref á ferlinum.
„Ég er 100% klár í að fara eitthvað lengra. Ég er búinn að vera úti í fjögur og hálft ár og hef þroskast mikið. Ég ætla ekki að segja að ég sé kominn á endastöð þarna en ég er allavega klár í næsta skref. Það er markmið fótboltamanna að spila á eins háu leveli og hægt er og markmið mitt er að spila í stærra landi en Danmörku," sagði Rúnar í KR Podcastinu.
Smelltu hér til að hlusta á Rúnar í KR Podcastinu
Athugasemdir