Fjórum leikjum var að ljúka í 2. deild karla nú rétt í þessu.

Í Mosfellsbæ var toppslagur þegar Afturelding og Grótta mættust. Fyrir leikinn var Afturelding á toppnum, en Grótta var þremur stigum á eftir.

Afturelding var 1-0 yfir í hálfleik eftir mark frá Wentzel Steinarr R Kamban, en snemma í seinni hálfleiknum jafnaði Sigurvin Reynisson metin fyrir gestina.

Það urðu lokatölur í leiknum, 1-1, en Afturelding spilaði síðustu sex mínúturnar einum færri eftir að Einar Marteinsson fékk að líta rauða spjaldið. Það kom hins vegar ekki að sök og Afturelding er áfram á toppnum í deildinni.

Magni frá Grenivík vann sigur á Vestra í markaleik. Magni komst 2-0 yfir, en Vestri var ekki lengi að jafna það eftir að flautað var til leiks í seinni hálfleik.

Magnamenn létu það hins vegar ekki stoppa sig og settu þrjú mörk í andlitið á Vesta og lokatölur 5-2 í Grenivík.

Í öðrum leikjum var það svo að frétta að KV hafði betur gegn KF, 3-0 og Völsungur vann sinn fyrsta sigur í deildinni gegn Hetti á heimavelli.