Tveir leikir fóru fram í Inkasso-deildinni í kvöld.

Grótta mætti Selfossi á Seltjarnarnesinu og þurftu heimamenn að leika einum manni færri í rúman klukkutíma eftir að Andri Þór Magnússon var rekinn útaf á 30. mínútu leiksins.

Selfyssingar náði að nýta sér liðsmuninn því Elvar Ingi Vignisson skoraði á 41. mínútu og Selfoss leiddi í hálfleik, 1-0.

Elvar var svo aftur á ferðinni á 63. mínútu og innsiglaði 2-0 sigur Selfoss á Gróttu. Með sigrinum komst Selfoss upp í 5. sæti deildarinnar en Grótta er í næst neðsta sæti.

Keflavík og Fylkir mættust í sannkölluðum toppslag. Liðin sitja í efstu tveimur sætum deildarinnar.

Það byrjaði vel fyrir Keflavík því Marko Nikolic kom þeim yfir á 23. mínútu leiksins.

Ragnar Bragi Sveinsson var að spila sinn fyrsta leik fyrir Fylki á þessu tímbili en hann snéri aftur til uppeldisfélags síns á dögunum. Hann jafnaði leikinn á 39. mínútu og var staðan 1-1 í hálfleik.

Keflavík komst aftur yfir á 64. mínútu leiksins en markið skoraði Lasse Rise. Fylkismenn voru hins vegar ekki lengi að jafna aftur en það gerði Albert Brynjar Ingason á 71. mínútu.

Í þriðja sinn í leiknum komust Keflavík yfir og var það aftur Lasse Rise sem var á ferðinni en undir lok leiksins jöfnuðu Fylkismenn leikinn í þriðja sinn en þar var Ragnar Bragi aftur á ferðinni. Lokatölur 3-3 í miklum markaleik.

Fylkir heldur því sínu tveggja stiga forskoti á Keflavík.