„Mér fannst þetta vera flottur leikur hjá liðinu í dag. Við gerðum það sem við höfum verið að gera undanfarið. Við vorum skipulagðir, vinnusamir og skoruðum gott mark," sagði Sverrir Ingi Ingason við Fótbolta.net eftir 1-0 sigur Íslands á Írlandi í kvöld.
Lestu um leikinn: Írland 0 - 1 Ísland
„Írarnir koma 100% í alla leiki og gefa ekki tommu eftir. Við unnum bardagann í dag og það skóp sigurinn. Við vorum sterkir í návígjum og gáfum aldrei færi á okkur. Það var lykillinn að sigri í dag."
Sverrir fékk tækifærið í hjarta varnarinnar í kvöld og var maður leiksins. Sverrir hefur verið þriðji miðvörður landsliðsins en hann er að reyna að brjóta sér leið inn í liðið.
„Kári og Raggi hafa spilað undanfarin fjögur ár og verið frábær. Við höfum unnið flesta leiki og það hefur ekki verið ástæða til að breyta. Þjálfarinn spilar á því liði sem hann telur að sé best hverju sinni. Ég er ungur og minn tími mun koma með landsliðinu. Ég er ekki að stressa mig á því. Á meðan ég held áfram að þróa mig sem leikmaður þá mun ég spila fullt af landsleikjum í framtíðinni. Það er ekki stress hvort það komi eftir sex eða átján mánuði," sagði Sverrir en vonast hann ekki eftir að fá sénsinn gegn Króatíu í júní?
„Auðvitað er maður alltaf klár í að spila ef kallið kemur. Ég held áfram að spila með Granada á Spáni og reyni að koma í toppstandi í leikinn í júní. Ef við náum í þrjú stig í júní þá erum við í bullandi séns á að ná þessu toppsæti," sagði Sverrir.
Hér að ofan má sjá viðtalið í heild sinni.
Athugasemdir