Dómarinn sá ekki þegar Alli kýldi Yacob en atvikið sást greinilega á myndbandsupptökum og staðfesti enska knattspyrnusambandið í dag að hann færi í þriggja leikja bann.

Alli mótmælti ekki dómi enska sambandsins og spilar hann ekki meira á tímabilinu þar sem Spurs á aðeins þrjá leiki eftir.

„Sleginn yfir því að tímabilinu sé lokið hjá mér," skrifaði Alli á Twitter. „Hefði ekki átt að bregðast við eins og ég gerði. Mun læra af þessu og koma sterkari til baka."

Alli spilar ekki með Tottenham gegn Chelsea á mánudag og missir einnig af leikjum gegn Southampton og Newcastle United. Næst mun hann sjást í eldlínunni með enska landsliðinu sem leikur þrjá vináttulandsleiki fyrir Evrópumótið.

Gutted that my season is over. Shouldn’t have reacted like I did. Will learn from this and come back stronger.

— Dele Alli (@Dele_Alli) April 28, 2016

Tottenham er sjö stigum á eftir toppliði Leicester í ensku úrvalsdeildinni þegar þrír leikir eru eftir. Leicester getur innsiglað titilinn með sigri gegn Manchester United á sunnudag.