Fjórðu umferð ensku úrvalsdeildarinnar lauk nú rétt í þessu þegar Gylfi Sigurðsson og félagar í Swansea fengu Man Utd í heimsókn.

Man Utd hafði ekki fengið á sig mark fyrir leikinn í dag og fyrri hálfleikurinn var mjög bragðdaufur á Liberty leikvangnum.

Það færðist aukið fjör í leikinn í síðari hálfleik en spænski miðjumaðurinn Juan Mata kom gestunum yfir snemma í síðari hálfleik eftir undirbúning Luke Shaw.

Forystan entist stutt því rúmum tíu mínútum síðar jafnaði Andre Ayew metin fyrir heimamenn. Hinn sjóðheiti Bafetimbi Gomis tryggði svo Swansea sigurinn þegar hann skoraði á 66.mínútu.Þriðja mark Gomis á tímabilinu en Sergio Romero leit illa út í markinu.

Wayne Rooney fékk kjörið tækifæri til að jafna metin undir lokin en var of lengi að athafna sig í vítateig Swansea og 2-1 sigur heimamanna í höfn.

Þetta er þriðji sigur Swansea á Man Utd í röð þar sem liðið vann báða leiki liðanna á síðustu leiktíð.