Ísland vann fyrri leik þjóðanna í undankeppninni á Laugardalsvelli fyrir ári síðan með tveimur mörkum gegn engu.

„Íslendingar spiluðu mjög þétt gegn okkur og við áttum í erfiðleikum með þá. Við reyndum að spila og sköpuðum færi sem okkur tókst ekki að nýta. Við verðum að undirbúa okkur virkilega vel í þetta sinn, við vitum hverju við eigum að búast við og þurfum að vera áræðnir í þetta sinn."

Blind var spurður hvað væri hættulegast við spilamennsku íslenska liðsins.

„Þeir spila mjög þétt og eru með gæði fram á við. Við verðum því að vera skipulagðir allir sem einn og að gefa ekki færi á okkur. Við verðum að undirbúa okkur þannig og halda fullri einbeitingu."

Hollendingar skiptu um fyrirliða og þjálfara fyrir leikinn. Danny Blind faðir Daley tók við þjálfuninni af Guus Hiddink og Arjen Robben tók við fyrirliðabandinu af Robin van Persie.

„Ég er stoltur af pabba að hafa tekið við þjálfarastarfinu en við erum enn með sama liðið og nýjan þjálfara eins og þú segir. En allir leikmennirnir og starfsmennirnir hérna vita hversu mikilvægur þessi leikur er."

En er ánægja með fyrirliðaskiptin?
„Ég sé engan kvarta og hef ekki spurt neinn," svaraði Blind brosandi en er þetta leikur upp á líf og dauða fyrir Hollendinga til að komast á Evrópumótið?

„Já, kannski má segja það. Við eigum fjóra leiki eftir en megum ekki við miklu svo þetta er upp á líf og dauða."