Lengjudeildin: Þrumufleygur Heiðars dugði ekki og Grindavík fallið - Svona lítur umspilið út

Völsungur þurfti að ná í stig gegn Gróttu og treysta á að annað hvort ÍR eða Grindavík tapaði stigum.

ÍR-ingar virtust ætla að gera út um nágrannaslaginn gegn Leikni strax í fyrri hálfleik þegar þeir skoruðu þrívegis.

Emil Nói Sigurhjartarson kom ÍR yfir á 7. mínútu með föstu skoti í vinstra hornið. Guðjón Máni Magnússon tvöfaldaði svo forystuna eftir hornspyrnu Emils. Hann var einn og óvaldaður og skoraði með föstum skalla.

Fimm mínútum síðar bætti Bergvin Fannar Helgason þriðja markinu við og ÍR fór með verðskuldaða þriggja marka forystu inn í hálfleikinn.

Leiknismenn komu ákveðnir til leiks í síðari hálfleik og Kári Steinn Hlífarsson minnkaði muninn. Þeir héldu áfram að sækja og hleyptu spennu í leikinn þegar Birnir Breki Burknason skoraði á 86. mínútu.

Birnir Breki fékk síðan færi til að jafna en Tareq Shihab kom ÍR til bjargar með frábærri tæklingu.

ÍR hélt út og vann 3-2 sigur sem tryggði liðinu áframhaldandi veru í deildinni. Liðið hafnaði í 7. sæti með 28 stig, jafnmörg og Leiknir sem endaði sæti ofar á betri markatölu.

Grindavík fallið

Grindavík gerði á sama tíma óvænt 1-1 jafntefli við fallið lið Ægis í Þorlákshöfn. Heiðar Snær Ragnarsson kom Grindvíkingum yfir á 16. mínútu með líklega flottasta marki sumarsins þegar hann hamraði boltann af löngu færi í samskeytin vinstra megin.

Ægismenn voru löngu fallnir en Grindvíkingar ætluðu sér ekki að fylgja þeim niður. Það dró hins vegar til tíðinda hálftíma fyrir leikslok þegar Daníel Karl Þrastarson fékk að vaða í gegn hægra megin og jafnaði með þrumuskoti. Grindavík var þar með komið í fallsæti.

Grindvíkingar fundu ekki sigurmarkið og féllu þar sem Völsungur gerði sitt með frábærum 2-0 útisigri á Gróttu.

Fernando Jimenez Arranz kom Völsungi yfir eftir að Seltirningum mistókst að hreinsa frá marki. Elvar Baldvinsson bætti öðru marki við eftir aukaspyrnu Dagbjarts Búa Davíðssonar. Boltinn fór í varnarvegginn en Dagbjartur fékk hann aftur og átti slakt skot sem fór í Elvar og þaðan í netið.

Völsungur hélt forystunni og tryggði sér áframhaldandi sæti í deildinni. Liðið lauk tímabilinu með 26 stig og bætti þar með félagsmet sitt í tólf liða deild um eitt stig frá síðasta ári.

Toppliðið tapaði

Afturelding hafði þegar tryggt sér sigur í Lengjudeildinni og sæti í Bestu deildinni. Það virtist vera spennufall hjá meisturunum en Njarðvík komst í tveggja marka forystu í fyrri hálfleik með mörkum Viktors Nóa Vidarssonar og Hrafns Guðmundssonar með ellefu mínútna millibili.

Síðari hálfleikurinn fór rólega af stað og lengi var fátt um fína drætti. Ari Hrafn Haraldsson minnkaði muninn fyrir Aftureldingu nokkrum mínútum fyrir leikslok en lengra komust meistararnir ekki. Njarðvík fagnaði því 2-1 sigri.

Þróttarar tóku annað sætið

Þróttur tryggði sér annað sætið með 2-0 sigri á Vestra á Kerecis-vellinum á Ísafirði.

Magnús Þórðarson braut ísinn á 57. mínútu eftir sendingu frá Erni Braga Hinrikssyni og kláraði færið af miklu öryggi.

Þróttarar fengu kjörið tækifæri til að tvöfalda forystuna fjórtán mínútum síðar þegar dæmd var vítaspyrna á Guðmund Pál Einarsson fyrir hendi. Vilhjálmur Kaldal Sigurðsson fór á punktinn en Benedikt Jóhann Snædal las hann vel og varði.

Gestirnir náðu þó að bæta öðru marki við undir lokin þegar Örn Bragi kórónaði frábæra frammistöðu sína með laglegu marki og gulltryggði sigurinn.

HK vann Fylki og tók fjórða sætið

HK vann 2-1 sigur á Fylki í toppslag í Kórnum.

Bæði lið fengu færi í fyrri hálfleik en gengu markalaus til búningsklefa. Mörkin létu hins vegar sjá sig í þeim síðari.

Dominik Radic kom HK yfir eftir frábæran undirbúning Jóhanns Þórs Arnarssonar. Jóhann fór illa með varnarmann á vinstri vængnum og lagði boltann á Radic sem skoraði.

Tíu mínútum síðar slapp Karl Ágúst Karlsson óvænt í gegn og tvöfaldaði forystuna með skoti framhjá Ólafi Kristófer Helgasyni.

Nikulás Val Gunnarsson hleypti spennu í leikinn á 71. mínútu þegar hann minnkaði muninn með föstu ristarskoti alveg út við stöng.

Fylkismenn fundu hins vegar ekki jöfnunarmarkið og HK fagnaði 2-1 sigri. HK endaði í 4. sæti með 38 stig en Fylkir í því þriðja með 40 stig.

Svona lítur umspilið út fyrir Bestu:
Þróttur R. - Njarðvík
Fylkir - HK

Grótta 0 - 2 Völsungur
0-1 Fernando Jimenez Arranz ('11 )
0-2 Elvar Baldvinsson ('38 )
Lestu um leikinn

Njarðvík 2 - 1 Afturelding
1-0 Viktor Nói Vidarsson ('16 )
2-0 Hrafn Guðmundsson ('27 )
2-1 Ari Hrafn Haraldsson ('88 )
Lestu um leikinn

ÍR 3 - 2 Leiknir R.
1-0 Emil Nói Sigurhjartarson ('7 , víti)
2-0 Guðjón Máni Magnússon ('20 )
3-0 Bergvin Fannar Helgason ('25 )
3-1 Kári Steinn Hlífarsson ('62 )
3-2 Birnir Breki Burknason ('86 , víti)
Lestu um leikinn

HK 2 - 1 Fylkir
1-0 Dominik Radic ('50 )
2-0 Karl Ágúst Karlsson ('60 )
2-1 Nikulás Val Gunnarsson ('71 )
Lestu um leikinn

Ægir 1 - 1 Grindavík
0-1 Heiðar Snær Ragnarsson ('16 )
1-1 Daníel Karl Þrastarson ('62 )
Lestu um leikinn

Vestri 0 - 2 Þróttur R.
0-1 Magnús Þórðarson ('57 )
0-1 Vilhjálmur Kaldal Sigurðsson ('71 , misnotað víti)
0-2 Örn Bragi Hinriksson ('86 )
Lestu um leikinn