Fylkir tók á móti Þrótti í 8. umferð Lengjudeildar karla, leiknum lauk með 1-3 sigri Þróttar. Fótbolti.net var á staðnum og ræddi við Sigurvin Ólafsson, þjálfara Þróttar, eftir leikinn.
Lestu um leikinn: Fylkir 1 - 3 Þróttur R.
„Ég er gríðarlega ánægður með mína menn og spilamennskuna í dag sem var mjög solid og þetta var sanngjarn sigur. Við vorum ekkert að tæta Fylkismenn í okkur en mér fannst vera ofan á og við allavega náðum að halda þeim vel í skefjum þannig að það stóð ekki mikil ógn af Fylkismönnum í fyrri hálfleiknum.''
Þróttarar komu vel út í seinni hálfleikinn og bæta við tveimur mörkum í síðari hálfleik. Hvað sagði Venni við sína menn í hálfleik?
„Ég gerði ráð fyrir að Fylkismenn myndu stíga ofar á völlinn í síðari hálfleik sem þeir gerðu. Við máttum ekki láta blekkjast á þessum fyrri hálfleik þó að við höfðum verið ofan á þar. Fylkismenn eru með gríðarlega sterkt lið og eru baráttuglaðir þannig ég reiknaði með að það yrði allt annar andi í þeim. Við þurftum bara að núllstilla okkur og byrja upp á nýtt og setja fókus í að berjast og vinna einvígin.''
Þróttur er komið á toppinn eftir sigur dagsins. Venni hlýtur að vera sáttur með það.
„Já auðvitað eru það góðar fréttir fyrir okkur en við höfum verið þar áður í sumar og nú þurfum við að höndla það aðeins betur en síðast.''
Viðtalið í heild sinni má sjá í spilaranum hér að ofan.
