Líkleg byrjunarlið í Akureyrarslagnum - Fjórir í banni og enginn Aron Einar

Fjórir leikmenn taka út leikbann í kvöld, tveir úr hvoru liði. Jeppe Pedersen og Birgir Baldvinsson verða ekki með KA og þeir Bjarni Guðjón Brynjólfsson og Ágúst Eðvald Hlynsson verða ekki með Þór.

Þá bárust þau tíðindi um helgina að Aron Einar Gunnarsson verður ekki með Þór í leiknum þar sem hann hefur skrifað undir samning hjá Qatar SC og spilar ekki fleiri leiki með Þór á tímabilinu.

Líklegt byrjunarlið KA
Jeppe hefur verið fastamaður inn á miðjunni hjá KA og vinstri bakvörðurinn Birgir er næstmarkahæsti leikmaður liðsins.

Steinþór Már Auðunsson er handarbrotinn og spilar ekki með KA á næstunni og Ívar Arnbro Þórhallsson stendur vaktina í markinu í stað Stubbs.

Við spáum því að Valdimar Logi Sævarsson komi inn í liðið fyrir Jeppe og að Samuel Kroon komi inn í vinstri bakvörðinn. Kroon hefur verið að glíma við meiðsli en Hallgrímur Jónasson, þjálfari KA, ýjaði að því í viðtali við Akureyri.net í gær að tveir leikmenn myndu snúa aftur í hópinn í dag. Aðrir kostir í vinstri bakvarðarstöðuna eru þeir Breki Hólm Baldursson og Kári Gautason.

Adam Ægir Pálsson spilaði sem fremsti maður í Eyjum og hann gæti skipt við Jakob Snæ sem hefur leyst stöðu fremsta manns.


Líklegt byrjunarlið Þórs
Það er öllu erfiðara að rýna í lið Þórs. Sigurður Heiðar Höskuldsson, þjálfari liðsins, sagði í viðtali við Akureyri.net í gær að þeir Christian Greko Jakobsen og Ragnar Óli Ragnarsson væru tæpir fyrir leikinn. Hann gaf hins vegar í skyn að Atli Sigurjónsson væri klár eftir að hafa glímt við meiðsli.

Þór fékk Þorra Ingólfsson á láni frá Víkingi í liðinni viku og Victor Bertomeu kom til Akureyrar eftir að hafa spilað í indversku ofurdeildinni fyrri part árs. Ingimar Arnar Kristjánsson var þá seldur til Århus Fremad í Danmörku.

Bjarni Guðjón hefur spilað miðsvæðis og einnig leyst stöður í varnarlínunni. Ágúst Eðvald hefur spilað fyrir aftan fremsta mann eða úti á kantinum. Út frá leikbönnum og brotthvarfi Arons Einars verða að lágmarki þrjár breytingar á liði Þórs milli leikja.

Við spáum því að þeir Ásbjörn Líndal Arnarsson og Birgir Ómar Hlynsson komi inn í varnarlínuna, Kristófer Kristjánsson færi sig upp á miðjuna og Vitor Bertomeu komi inn í liðið sem fremsti maður.

Sigfús Fannar og Þorri Ingólfs gera einnig tilkall í það hlutverk, en við spáum því að Siggi veðji á nýja Spánverjann. Þeir Sigfús og Þorri gera sömuleiðis tilkall í að byrja á vinstri kantinum en við spáum því að Fannar byrji þar. Atli kemur svo inn og leysir hlutverk Ágústs á kantinum, en Atli gæti einnig spilað miðsvæðis og Kristófer á kantinum.

Greko er tæpur vegna meiðsla og okkur þykir líklegt að Gyrðir færi sig upp á miðjuna ef sá danski er ekki klár í slaginn. Þá gætu Sverrir Páll Ingason (bakvörður) og Hermann Helgi Rúnarsson (varnarsinnaður miðjumaður) einnig fengið kallið.