Lestu um leikinn: Valur 4 -  0 ÍBV

"Já ég held að þetta hafi bara verið nokkuð öruggt. Við gerðum út um þetta í fyrri hálfleik og vorum kannski aðeins rólegri í seinni enda erfiður leikur framundan svo það er gott að þetta hafi verið nokkuð öruggt"

"Við hefðum kannski getað haldið boltanum aðeins betur, vorum oft að missa hann klaufalega og gera þetta óþarflega erfitt fyrir okkur. Við hefðum þó getað unnið þennan leik töluvert stærra en ég er svosem mjög sátt með 4:0."

Spilaðist leikurinn eins og Hallbera bjóst við?

"Já í rauninni, þær voru með einhverja 5 manna línu í fyrri hálfleik og mjög þéttar og berjast mikið en við sýndum bara að við erum betra fótboltalið og úrslitin sýna það."

Hallbera fékk að hvíla síðustu 10 mínútur leiksins. Var verið að hvíla hana fyrir stórleikinn við Breiðablik í næstu umferð?

"Ég hefði náttúrulega sjálf viljað spila áfram en hann er eitthvað hræddur um að gömlu konurnar séu orðnar þreyttar en það er engin þreyta í okkur."

Næsti leikur Vals er gegn Blikum þar sem svokallaður úrslitaleikur deildarinnar fer fram. En liðin tvö hafa verið í sérflokki í sumar og sitja í fyrsta og öðru sæti deildarinnar.

"Já þessi leikur er svolítið búinn að hanga yfir manni. Við vissum að við þyrftum að klára leikina fram að þessum leik til að gera þetta að úrslitaleik og þetta verður þannig. Þetta er einfaldlega úrslitaleikur um Íslandsmeistaratitilinn og ég hef farið í nokkra svoleiðis leiki og það er bara ógeðslega gaman. Ég á von á að fullt af fólki mæti á völlinn og þetta verður hörkuleikur hjá tveimur bestu liðunum í sumar sem munu klára mótið þarna."

Viðtalið við Hallberu má sjá í spilaranum hér að ofan