Lestu um leikinn: Vestri 0 -  0 ÍA

Á 62. skrifaði svo Hákon eftirfarandi „Sammi: "Það er komin endursýning á þessu, Vestramaðurinn var ekki rangstæður!" Glymur í Samma yfir allan völlinn"

Sammi er Samúel Samúelsson og er hann formaður meistaraflokksráðs Vestra.

Atvikið var til umræðu í Innkastinu og Valur Gunnarsson var með sterka skoðun á þessari hegðun Samma.

„Það er gaman af því að Sammi var á vellinum og heyrðist vel í útsendingunni að hann öskraði inn á völlinn að hann væri búinn að horfa á þetta aftur og sinn maður hefði ekki verið rangstæður," sagði Elvar Geir.

„Nú veit ég ekki hvaða Stöð 2 Sport er á Ísafirði, en þetta finnst mér bara lélegt. Þarna ertu að planta efa í huga aðstoðardómarans sem fer kannski að hugsa að hann hefði séð þetta vitlaust. Svo horfir maður á þetta sjálfur og sér að þetta er rangstaða, allavega ekki nógu mikið ekki-rangstaða að þú getir öskrað þetta inn á völlinn," sagði Valur.

„Aðstoðardómarinn er í bestu aðstöðu, þetta er einnar kameru leikur," sagði Elvar.

„Ef þetta hefði verið greinilegt að hann sá ekki gaur sem var kannski við hornfána eða eitthvað svoleiðis, þá hefði ég skilið þetta. En við þessa endursýningu þá hugsaði ég að hann ætti að sleppa þessu," sagði Valur.

„Þú ert í þessari stöðu hjá félaginu, þú átt ekki að láta svona," sagði Haraldur Örn.

Umræðuna má nálgast eftir um 20 mínútur af þættinum hér að neðan.