Þýskaland: Evrópusætið í hættu hjá Freiburg

Freiburg, sem er komið í úrslit Evrópudeildarinnar, gæti misst af því að komast í Evrópukeppni á næsta ári eftir að liðið tapaði fyrir Hamburger SV, 3-2, í næst síðustu umferð þýsku deildarinnar í dag.

Nýliðarnir tóku forystuna snemma leiks er Bakery Jatta skoraði á fjærstönginni eftir sendingu frá Albert Grönbæk.

Igor Matanovic jafnaði tveimur mínútum síðar er hann stýrði laglegri fyrirgjöf Lukas Kubler í netið og stóðu leikar í hálfleik, 1-1.

Luka Vuskovic, sem er á láni hjá Hamburger frá Tottenham, skoraði úr aukaspyrnu á 64. mínútu er hann hamraði boltanum undir vegginn. Markvörðurinn var með höndina í boltanum, en úlnliðurinn gaf aðeins eftir og lak boltinn í netið.

Fabio Balde kom þeim í tveggja marka forystu eftir svakalegan sprett á hægri vængnum áður en Matanovic minnkaði muninn nokkrum mínútum fyrir leikslok með skalla eftir hornspyrnu.

Vont tap fyrir Freiburg sem er í 7. sæti deildarinnar með 44 stig, sem gefur farseðil í Sambandsdeildina, en Freiburg mætir Leipzig í lokaumferðinni.

Ef Freiburg tapar þar mun liðið líklega þurfa að vinna Evrópudeildina til þess að komast í Evrópukeppni. Hamburger er á meðan í 11. sæti með 37 stig.