Jones rekinn eftir þrjá mánuði í starfi (Staðfest)

Sá velski tapaði níu af fjórtán leikjum í öllum keppnum eftir að hann var ráðinn þann 10. nóvember. Þar af voru átta tapleikir af níu úrvalsdeildarleikjum og fjórir tapleikir í röð á heimavelli, St Mary's.

Chris Cohen og Alan Sheehan aðstoðarmenn hans hafa einnig yfirgefið félagið en Ruben Selles sem er í þjálfarateyminu mun stýra leiknum gegn Chelsea næsta laugardag.

Stuðningsmenn Southampton bauluðu eftir tapið gegn Wolves í gær. Southampton komst í 1-0 og þrátt fyrir að Úlfarnir misstu mann af velli með rautt spjald náðu þeir að snúa dæminu við og tryggja sér sigur.

Fyrir viku síðan, í tapi gegn Brentford, mátti heyra sungið í stúkunni: 'Þú verður rekinn á morgun' og 'Nathan Jones, farðu út úr félaginu okkar'.