Ásdís og Ída skoruðu í lokaumferðinni - Thelma lagði upp þegar Häcken fagnaði titlinum

Häcken tryggði sér sænska meistaratitilinn með 4-1 sigri á Kristianstad þann 2. nóvember, en leikmenn liðsins gátu loksins fagnað almennilega eftir lokaumferðina í dag.

Thelma var að sjálfsögðu í byrjunarliði meistaranna og lagði upp fyrra markið fyrir Maju Bodin í upphafi síðari hálfleiks.

Thelma átti glæsilegt tímabil með Häcken og lauk deildarkeppninni með sex mörk og sjö stoðsendingar.

Ída Marín Hermannsdóttir hefur einnig farið á kostum undanfarna mánuði, en hún gekk til liðs við Hammarby frá FH í ágúst.

Hún skoraði sigurmark Hammarby í 1-0 sigri á Kristianstad í dag og var það hennar fimmta mark í aðeins átta deildarleikjum.

Guðrún Arnardóttir var einnig í byrjunarliði Hammarby sem hafnaði í öðru sæti deildarinnar með 65 stig. Hjá Kristianstad voru Guðný Árnadóttir og Alexandra Jóhannsdóttir í byrjunarliðinu, en Elísa Lana Sigurjónsdóttir kom inn af bekknum.

María Catharina Ólafsdóttir Gros var í byrjunarliði Djurgården sem marði 1-0 sigur á Eskilstuna. Freyja Stefánsdóttir sat allan leikinn á varamannabekknum, en Heiða Ragney Viðarsdóttir kom inn á hjá Eskilstuna.

Djurgården endaði í áttunda sæti með 34 stig, aðeins einu stigi á undan Eskilstuna sem hafnaði í níunda sæti.

Hlín Eiríksdóttir var í byrjunarliði Malmö sem gerði 1-1 jafntefli við Vittsjö og lauk tímabilinu í þriðja sæti með 48 stig.

Þá skoraði Ásdís Karen Halldórsdóttir fyrir AIK í 1-1 jafntefli gegn Norrköping. Mark hennar kom úr vítaspyrnu á fjórðu mínútu í uppbótartíma en Norrköping jafnaði rúmri mínútu síðar.

Ásdís var að gera áttunda mark sitt en hún gerði einnig tvær stoðsendingar á tímabilinu eftir að hafa komið frá FH í haust.

Sigdís Eva Bárðardóttir kom inn af bekknum hjá Norrköping þegar tuttugu mínútur voru eftir.

Norrköping náði naumlega að halda sæti sínu í deildinni með 28 stig, en AIK hafnaði í fjórða sæti með 44 stig.