2. deild kvenna: Ekkert fær Aftureldingu stöðvað

Afturelding er áfram með fullt hús stiga í 2. deild kvenna eftir 4-1 stórsigur á ÍR á Malbikstöðinni að Varmá í Mosfellsbæ í gær.

Mosfellingar ætla sér stóra hluti í deildinni í ár og virðist ekkert ætla að stöðva liðið.

Maria Baska og Monika Piesliakaite komu þeim í 2-0 áður en Sara Atladóttir minnkaði muninn.

Afturelding gaf aftur í eftir mark ÍR-inga með tveimur mörkum á tíu mínútum. Sarai Vela Menchon og Karen Dæja Guðbjartsdóttir skoruðu mörkin, en Karen var að gera sjöunda deildarmark sitt á tímabilinu.

Frábær sigur hjá Aftureldingu, sem er í öðru sæti með fullt hús eftir fjórar umferðir, einu stigi á eftir Fjölni sem er á toppnum með fimm leiki spilaða. ÍR er í 7. sæti með fjögur stig.