FC Sækó sótti silfur til Þýskalands: Gríðarlega stoltur

EASI Cup er alþjóðlegt mót sem haldið er árlega undir merkjum European Association for Sport and Social Integration, EASI, og markmiðið með því er að nota fótbolta til þess að virkja fólk sem glímt hefur við geðheilbrigðisvandamál.

Fjórtán lið frá átta löndum tóku þátt í mótinu. Liðin mættust öll í deildarkeppni sem spiluð var á tveimur dögum og að lokum mættust tvö efstu liðin í úrslitaleik. Mótshaldarar ákváðu að sleppa undanúrslitum og styttu leiki mótsins vegna hitabylgjunnar sem reið yfir Þýskaland dagana sem mótið var haldið. Meðalhitinn var um 35 gráður á Celcius og aðstæður því afar krefjandi.

Úrslit leikja FC Sækó urðu sem hér segir:

Fyrri dagur:
FC Sækó - Steyr (Austurríki) 0-0
FC Sækó - Bad Tölz B (Þýskalandi) 2-0
FC Sækó - Karlovarský (Tékklandi) 9-0
FC Sækó - Mladá Boleslav (Tékklandi) 6-0
FC Sækó - Motspur Park B (Englandi) 3-0
FC Sækó - Bad Tölz (Þýskalandi) 1-0
FC Sækó - Frankfurter (Þýskalandi) 0-3
Seinni dagur:
FC Sækó - FC Brubmühle (Austurríki) 5-0
FC Sækó - Red Cross (Hollandi) 3-0
FC Sækó - SKpDZ/Pro Dusevni (Tékklandi/Slóvakíu) 0-2
FC Sækó - Taball-Tabor (Tékklandi) 2-0
FC Sækó - Motspur Park (Englandi) 1-0
FC Sækó - Kralji (Slóveníu) 0-1

Komnir í úrslit fyrir lokaleikinn
Lið FC Sækó var búið að tryggja sér annað sætið með harðsóttum en sanngjörnum sigri á enska liðinu Motspur Park í næstsíðustu umferð, 1-0, og hvíldi því alla þá sem voru tæpir vegna meiðsla í lokaleiknum gegn Kralji frá Slóveníu. Þeir sem spiluðu fóru sparlega með sig til að vera klárir í úrslitaleikinn gegn heimamönnum í Bad Tölz.

Bad Tölz fékk 34 stig úr leikjunum þrettán, FC Sækó fékk 28 stig og Motspur Park og Steyr komu þar á eftir með 27 stig hvort.

Úrslitaleikur FC Sækó og Bad Tölz var jafn og spennandi. Heimamenn komust yfir með góðu langskoti undir lok fyrri hálfleiks. Sækómenn sóttu stíft í seinni hálfleik en skotin rötuðu ekki á mark Þjóðverjanna sem fögnuðu þar með sigri, 1-0.

Lögðu mikið á sig
“Ég er gríðarlega stoltur af þeim árangri liðsins að hafa komist í úrslitaleik í fyrsta skipti í sögunni og er rosalega ánægður með hve vel okkur gekk að mynda sterka liðsheild. Menn lögðu mikið á sig og voru duglegir í undirbúningi fyrir mótið. Liðið small vel saman á mótinu og árangurinn er eftir því og er verðskuldaður,” sagði Jón Grétar Jónasson þjálfari FC Sækó.