Robertson nálægt samkomulagi við Tottenham

Andy Robertson, leikmaður Liverpool, er kominn langt í viðræðum við Tottenham um að ganga í raðir Lundúnafélagsins á frjálsri sölu þegar samningur hans rennur út í sumar.

Tottenham hefur lengi haft áhuga á þessum 32 ára vinstri bakverði og reyndi að kaupa hann í janúarglugganum en Liverpool var ekki tilbúið að hleypa honum í burtu.

Breska ríkisútvarpið segir að samkomulag Robertson sé ekki í höfn en viðræður séu langt komnar. Samkomulagið velti hinsvegar á því að Tottenham haldi sér í ensku úrvalsdeildinni.

Tottenham er í átjánda sæti deildarinnar og i fallsæti, tveimur stigum frá West Ham sem er í sautjánda sæti.

Tottenham vill fá inn reynslu og leiðtogahæfileika í leikmannahóp sinn.