Vestri er komið aftur á sigurbraut en liðið lagði KA af velli í dag eftir að hafa tapað tveimur leikjum í röð þar á undan. Fótbolti.net ræddi við Davíð Smára Lamude, þjálfara Vestra, eftir leikinn.
Lestu um leikinn: Vestri 1 - 0 KA
„Gríðarlega sáttur við fyrri hálfleikinn en ekki neitt alltof sáttur með seinni hálfleikinn. Strákunum til varnar þá líður okkur ofboðslega vell að verjast en við þurfum að vera hugrakkari á boltann og reyna spila okkur upp völlinn, þetta var ekki alveg það sem við lögðum upp með inn í hálfleik," sagði Davíð Smári.
Gunnar Jónas Hauksson átti frábæran leik í dag og hann fékk mikið hrós frá Davíð Smára.
„Við lögðum mikið upp úr því að Gunnar yrði með okkur á þessu tímabili líka. Hann spilar af gríðarlega miklu hjarta og það er mikill karakter í honum. Gunnar Jónas er að einhverju leyti skjaldamerki þess sem Vestri stendur fyrir og smitar út frá sér. Hann er einn af þeim sem eru tilbúnir að berjast allt til enda og við þurftum að gera það í dag," sagði Davíð Smári.
Davíð Smári missti af eina marki leiksins.
„Ég var akkúrat að fá mér að drekka þegar markið kom. Mér skilst að það hafi verið mjög gott mark og ég er ánægður með það. Ég verð að skoða það aftur á Spiideo," sagði Davíð Smári léttur.
Athugasemdir
