Rodrigo De Paul, liðsfélagi Lionel Messi í argentínska landsliðinu, vill að hann komi til Atlético Madríd í sumar, en þetta sagði hann í viðtali í spænska útvarpsþættinum El Larguero.
Samband Messi og De Paul er afar náið og er miðjumaðurinn þekktur fyrir það eitt að vera einhverskonar lífvörður Messi á vellinum.
Á HM var De Paul mættur í alla sem reyndu að ógna stórstjörnunni og sá til þess að enginn myndi tækla einn þann besta í heiminum.
De Paul vill nú fá Messi til Atlético og segist ætla að hjálpa honum að finna íbúð í Madríd. Messi verður samningslaus í sumar en ekki er ákveðið hvort hann verði áfram í París.
„Fáum Messi til Atlético. Við segjum Angelito (Correa) að gefa honum tíuna og svo förum við saman og leitum að íbúð í miðborg Madrídar,“ sagði De Paul.
Þegar De Paul var beðinn um að lýsa Messi þá var hann með stutt og hnitmiðað svar: „Hann er geimvera,“ sagði De Paul.
Athugasemdir