England: Arsenal stal stigunum á Selhurst Park

Crystal Palace og Arsenal áttust við í enska boltanum í kvöld og var fyrri hálfleikur í járnum. Heimamenn voru hættulegri en gestirnir gerðu eina markið.

Nicolas Pepe gerði vel að koma sér framfyrir varnarmann og skora eftir glæsilega fyrirgjöf frá Kieran Tierney sem kom eftir frábæra sókn.

Arsenal hélt knettinum vel en fann ekki glufur á varnarleik Palace. Heimamenn voru talsvert hættulegri í sínum sóknaraðgerðum og verðskulduðu jöfnunarmark sem Christian Benteke skoraði með skalla á 62. mínútu.

Palace var hættulegri aðilinn en það gerðist ekki mikið þar til í uppbótartíma, þegar varamennirnir Martin Ödegaard og Gabriel Martinelli gerðu sigurmark Arsenal. Martinelli skoraði þá eftir fyrirgjöf frá Ödegaard.

Heimamenn lögðu allt í sóknarleikinn en gestirnir refsuðu með þriðja markinu. Pepe var þar aftur á ferðinni og lokatölur 1-3 endurspegla ekki gang leiksins.

Arsenal á því enn möguleika á Evrópudeildarsæti. Möguleikarnir eru fínir ef West Ham tekst ekki að koma til baka í kvöld eftir að hafa lent undir gegn West Brom.