Ítalía: Svekkjandi jafntefli í fallbaráttuslag

Empoli gerði 2-2 jafntefli við Íslendingalið Venezia í fallbaráttuslag í 33. umferð Seríu A í Toskana-héraði í dag.

Landsliðsmaðurinn Mikael Egill Ellertsson var eins og venjulega í byrjunarliði Venezia á meðan Bjarki Steinn Bjarkason var á bekknum.

Venezia var betra liðið í fyrri hálfleiknum og ógnaði nokkrum sinnum á meðan Empoli gerði lítið sem ekkert fram á við.

Það varð breyting á því í síðari hálfleiknum því Jacopo Fazzini tók forystuna fyrir heimamenn á 59. mínútu sem skoraði með glæsilegu skoti eftir frábæra fyrirgjöf Liam Henderson.

Markið virtist ætla að gefa Empoli byr undir báða vængi og liðið í leit að öðru marki, en það kom skellur aðeins níu mínútum síðar eftir slæm mistök frá Devis Vasquez, markverði Empoli, sem mistókst að grípa hornspyrnu Nicolussi Caviglia og náði John Yeboah að nýta það með því að pota boltanum í netið.

Venzia tók völdin og komst yfir með marki frá Gianluca Busio þegar fimm mínútur voru til leiksloka, en heimamenn svöruðu um hæl með laglegu marki Faustino Anjorin.

Svekkjandi jafntefli fyrir bæði lið sem eru í harðri fallbaráttu en liðin eru með 25 stig í 18. og 19. sæti deildarinnar þegar fimm umferðir eru eftir.