England: Everton skellti Chelsea

Everton og Chelsea áttust við í ensku úrvalsdeildinni í dag og skoraði Beto eina markið í fyrri hálfleik. Everton var sterkara liðið í fyrri hálfleik en tókst ekki að skora fyrr en Chelsea virtist vera að komast inn í leikinn.

Vörnin hjá Chelsea hélt vel í hálftíma en svo skoraði Beto eftir frábæra stungusendingu frá James Garner.

Chelsea reyndi að svara fyrir sig en Jordan Pickford varði meistaralega til að halda forystunni fyrir heimamenn, svo staðan var 1-0 í leikhlé.

Í síðari hálfleik gerðu heimamenn vel að drepa hraða leiksins niður og nýta þau fáu færi sem sköpuðust. Everton virtist líða mjög vel á vellinum á meðan gestirnir frá London fundu engar lausnir.

Chelsea fékk nokkur góð færi en Pickford varði meistaralega.

Beto tvöfaldaði forystu Everton á 62. mínútu eftir að Chelsea tapaði boltanum klaufalega á miðjunni og innsiglaði Iliman Ndiaye magnaðan 3-0 sigur með afar snoturri afgreiðslu korteri síðar. Robert Sánchez markvörður Chelsea átti að gera betur á milli stanganna.

Everton er í sjöunda sæti úrvalsdeildarinnar með 46 stig eftir þennan sigur, aðeins tveimur stigum á eftir Chelsea í evrópubaráttunni.