Newcastle United tók á móti Sunderland í hatrömmum nágrannaslag í fyrsta leik dagsins í ensku úrvalsdeildinni.

Úr varð hörkuslagur þar sem Newcastle byrjaði betur og náði forystunni á tíundu mínútu þegar Anthony Gordon nýtti sér skelfileg mistök hjá Luke O'Nien í varnarlínu Sunderland.

O'Nien gaf lélega sendingu undir pressu og vann Nick Woltemade boltann. Boltinn barst til Gordon sem nýtti tækifærið og skoraði með góðu skoti.

Newcastle var sterkari aðilinn í fyrri hálfleik en Sunderland fékk einnig sín færi. Hvorugu liði tókst þó að bæta marki við leikinn svo staðan var 1-0 í leikhlé.

Í síðari hálfleik voru gestirnir frá Sunderland sterkari og gerði Chemsdine Talbi jöfnunarmark eftir hornspyrnu á 57. mínútu. Newcastle mistókst að hreinsa boltann úr vítateignum og enduðu gestirnir á að eiga nokkrar tilraunir áður en þeir komu boltanum loks í netið.

Sunderland var áfram sterkari aðilinn í síðari hálfleiknum og náði forystunni með marki frá Brian Brobbey á lokamínútunum. Brobbey var skilinn eftir einn og óvaldaður tvo metra frá marklínunni. Ramsdale varði fyrri marktilraunina en Brobbey skoraði úr frákastinu.

Newcastle reyndi að sækja jöfnunarmark í löngum uppbótartíma en skapaði ekki mikla hættu, svo lokatölur urðu 1-2 fyrir Sunderland.

Þetta tap er skellur fyrir evrópuvonir Newcastle sem er núna fyrir neðan Sunderland á stöðutöflunni. Nýliðar Sunderland eru aðeins þremur stigum frá óvæntri evrópubaráttu.