Ein besta frammistaða í sögu landsliðsins

Ísland var búið að sækja 16 stig í átta leikjum í undanriðlinum og átti eftir tvo leiki. Króatía var einnig með 16 stig en betri markatölu, Tyrkland og Úkraína fylgsu svo fast á hæla okkar með 14 stig. Níundi og næstsíðasti leikur Íslands var útileikur gegn Tyrklandi, einn erfiðasti útivöllur í Evrópu að heimsækja. Tyrkir eru þekktir fyrir gífurlega mikla stemningu á leikjum sínum og mikinn hávaða sem myndast. Íslensku stuðningsmennirnir voru um 200 gegn um 40.000 Tyrkjum og ljóst var að verkefnið yrði erfitt. 

Strákarnir okkar mættu ansi vel gíraðir til leiks og voru mjög sannfærandi í öllum aðgerðum en eftir um hálftíma leik kom Jóhann Berg okkur yfir eftir frábæran undirbúning Jóns Daða af vinstri kantinum. Sjö mínútum síðar var Jón Daði aftur á ferðinni með aðra stórkostlega stoðsendingu en hann vann einvígi á miðjum vellinum, fékk boltann síðan aftur með tvo menn í sér og klobbaði einn og kom boltanum inn fyrir á Birki Bjarnason sem kom Íslandi í 0-2.

Það var síðan í byrjun síðari hálfleiks sem fast leikatriði beint af æfingasvæðinu skilaði þriðja marki Íslands en það mark kom eftir hornspyrnu. En það sem var enn betra við þetta kvöld var það að á 90. mínútu leiks Króatíu og Finnlands jafnaði Pyry Soiri metin fyrir Finnland. Leikurinn endaði 1-1 og þýddi það að Ísland var komið í bílsstjórasætið um sæti á HM og aðeins einn leikur eftir. Ísland var með 19 stig en Króatía og Úkraína með 17 stig.