„Tilfinningin er ömurleg, við ætluðum okkur sigur í dag," sagði Hallgrímur Mar Steingrímsson leikmaður KA eftir 2-2 jafntefli liðsins gegn FH í dag.
Lestu um leikinn: KA 2 - 2 FH
KA endar í 4. sæti deildarinnar en með sigri hefði liðið endað í 3. sæti sem gæti gefið evrópusæti.
„Vildum halda þessu evrópusæti, þetta er reyndar ekkert evrópusæti ennþá, Víkingur þarf að vinna bikarinn en auðvitað ætluðum við að halda í vonina með að taka sigur í dag en við vorum ekki alveg nógu góðir því miður," sagði Hallgrímur.
Hann var gríðarlega svekktur hvernig liðið mætti í leikinn þegar svona mikið er undir.
„Mér fannst við vera á eftir þeim í öllum atriðum. Þeir eru með unga og ferska stráka sem leggja sig fram og eru góðir í fótbolta finnst mér. Auðvitað þegar það er svona mikið undir þá eigum við að mæta sterkari til leiks, sorglegt á þessu augnabliki að eiga svona leik."
Hallgrímur gat lítið sagt þegar hann var spurður út í frammistöðu liðsins á tímabilinu.
„Það er bara búið að vera gott, erum með 40 stig, það er ágætt en ég nenni bara ekki að tala um það núna því miður," sagði Hallgrímur að lokum.
Athugasemdir