Klæmint fékk boltann nokkrum sentímetrum fyrir opnu marki en setti boltann yfir.

Samkvæmt WyScout var færið 0,77 í xG. 'Expected goals' eða 'xG' er tölfræði sem sýnir fram á það hversu líklegt er að lið skori miðað við marktækifæri. Vítaspyrna er mæld sem 0,76 í xG hjá WyScout en færið sem Klæmint fékk í gær var aðeins betra færi en vítaspyrna samkvæmt greiningunni.

Færið sem Klæmint klúðraði í gær er þó ekki mesta klúður tímabilsins í Bestu deildinni ef horft er í WyScout xG-tölfræðina því Þórir Guðjónsson, sóknarmaður Fram, klúðraði færi sem var 0,80 í xG í leik gegn KR á dögunum. Nacho Heras, varnarmaður Keflavík, fékk þá færi sem var 0,82 í xG í fyrstu umferðinni gegn Fylki en tókst ekki að skora.

Myndband af færinu hjá Nacho má sjá hér að neðan. Einnig er hægt að sjá færið sem Klæmint fékk hér fyrir neðan en það var birt upprunlega á Vísi. Það er alveg klárlega hægt að deila um xG-útreikningana í þessum tilvikum.

Hægt er að lesa um xG á vefsíðu WyScout með því að smella hérna en ýmsir þættir eru teknir með inn í formúlu sem er notuð til að ákvarða xG. Færið hans Nacho er til dæmis 0,82 í xG og er þá verið að reikna það þannig að búist sé við því að hann skori í 82 af hverjum 100 svona færum.

Klæmint ekki ábyrgur fyrir jafnteflinu
Leik Keflavíkur og Breiðabliks lauk með markalausu jafntefli en Óskar Hrafn Þorvaldsson, þjálfari Breiðabliks, skellti skuldinni ekki á Klæmint.

„Klæmint fékk gott færi og brenndi því af. Ég átta mig ekkert á því hvernig hann skoppaði fyrir hann, hversu hratt hann kom eða hvernig þetta var. Ég veit bara að Klæmint er maður sem er búinn að skora yfir þrjú hundruð mörk á meistaraflokksferli sínum, er fæddur markaskorari og ég geri bara ráð fyrir að þetta hafi bara verið erfitt og boltinn ekki legið vel fyrir honum. Við brennum af færum saman, fáum á okkur mörk saman, töpum saman og fögnum sigrum saman. Það er ekki Klæmint Olsen sem er ábyrgur fyrir því að við gerum jafntefli í þessum leik," sagði Óskar Hrafn.