Besta deildin: Stjarnan með mikilvægan sigur í baráttunni um Evrópusæti

Emil Atlason kom Stjörnunni yfir þegar hann skallaði boltann í netið eftir hornspyrnu frá Hilmari Árna Halldórssyni. Skagamenn voru nálægt því að jafna stuttu seinna en Stjörnumönnum tókst að bjarga á línu eftir skalla frá Marko Vardic.

Stjarnan byrjaði seinni hálfleikinn vel og uppskáru þegar Hilmar Árni átti skot í stöng en Johannes Vall varð fyrir því óláni að setja boltann í eigið net þegar hann ætlaði að hreinsa frá.

Skagamenn áttu erfitt uppdráttar í kvöld en fengu tækifæri undir lok leiksins en tókst ekki að nýta það.

Stjarnan gerði út um leikinn í uppbótatíma þegar Hilmar Árni sendi boltann í gegn og Jón Hrafn Barkarson skoraði af miklu öryggi.

Stjarnan er nú aðeins stigi á eftir Val í baráttunni um Evrópusæti en ÍA er fimm stigum á eftir Valsmönnum.