Kári Ársælsson gekk til liðs við uppeldisfélag sitt Breiðablik á nýjan leik fyrir helgi. Kári var gestur í útvarpsþættinum Fótbolta.net á X-inu 97,7 um helgina.
,,Ég er gríðarlega sáttur með að vera kominn heim. Ég tók smá tíma í að hugsa hvað ég vildi gera og þegar upp er staðið er Breiðablik mitt lið," sagði Kári í þættinum.
,,Það er svo ótrúlega stutt á milli bestu liðanna á Íslandi og þeirra sem eru rétt fyrir neðan. Við erum ekki búnir að fara í nákvæm markmið en mér finnst að Breiðablik sé félag sem eigi alltaf að stefna á topp 3."
Kári fékk nokkrar óþægilegar spurningar í þættinum og hann var meðal annars spurður út í það hvort hann ætli ekki að fara aftur á lán í neðri deildirnar næsta sumar? ,,Það er allt undir mér sjálfum komið og hvað þjálfurunum finnst um mig. Það verður bara að koma í ljós," sagði Kári.
Luka heyrði eftirhermuna
Kári var meðal annars spurður út í veiðimennsku, falldrauginn, bíllykla og fleira auk þess sem hann henti í eftirhermu. Þá sagði hann sögu sem hann hefur lengi beðið með að segja.
,,Þegar ég var valinn í U21 árs landsliðið á sínum tíma var Luka Kostic að þjálfa. Hann var líka með Grindavík og ég fylgdist vel með honum í viðtölum. Ég vona að hann taki þessu ekki of illa ef hann er að hlusta því að ég ber mikla virðingu fyrir honum og finnst hann mjög góður þjálfari."
,,Við Blikar vorum að spila í Eyjum og ég og Guðmann (Þórisson) vorum saman í hafsent. Ég var aftast í rútunni að reyna að vera hrókur alls fagnaðar eins og oft og var að leika Luka. 'Strákar, vindur spila stórt hlutverk í þessum leik. Það er ekki hægt að spila framhjá vindur.'
,,Þá pikkar Steini markmaður (Þorsteinn Einarsson) í mig. 'Kári, Ertu að leika Luka? Hann er hérna fremst'. Þá heyrði hann allt. Ég veit ekki hvort það hafi verið það eða að við töpuðum 4-0 fyrir Skotum en ég var allavega aldrei valinn aftur í U21 árs landsliðið," sagði Kári og hló.
Athugasemdir