Finnst þér þá kannski eins og þú sért búinn að afreka allt sem þú getur hjá Horsens?

„Já, það er vel að orði komist. Ég kom þegar það var allt í rugli í 1. deildinni. Síðan skoraði ég 18 mörk og við fórum upp í úrvalsdeildina. Í fyrra héldum við okkur uppi í síðasta leik. Núna er ég orðinn fyrirliði og við erum í þessu topp sex hluta sem er að spila um meistaratitilinn. Ég held að toppnum sé náð. Maður er nú ekki að yngjast svo það væri gaman að prófa eitthvað eitt í viðbót."

Hinn 31 árs gamli Kjartan segir að lífið sé ljúft í Danmörku og útilokar alls ekki að vera þar áfram.

„Okkur líður rosa vel í Danmörku. Við erum með tvö börn og erum orðin hálfdönsk. Ég útiloka ekki neitt."

Í janúar hafði Bradford í C-deildinni á Englandi áhuga og gerði tilboð. Kjartan sagði hins vegar sjálfur nei áður en málið fór lengra.

„Það myndi örugglega henta mér vel að spila á Englandi. Það kom tilboð frá Englandi og líka hérna frá Danmörku. Ég hef sýnt mikla tryggð en ég er opinn fyrir öllu," segir Kjartan sem hóf atvinnumannaferil sinn hjá Celtic í Skotlandi.

„Það væri gaman að byrja ferilinn í Bretlandi og enda hann þar. Það er ákveðin rómantík í því."

Reglulega minntur á HM
Kjartan er í baráttu um að fara með íslenska landsliðinu á HM í Rússlandi í suamr. Hann telur að óvissa um framtíð sína muni ekki vefjast fyrir þegar kemur að landsliðinu.

„Ég er búinn að nýta mín tækifæri ágætlega með landsliðinu og það breytir svo sem engu hvar ég spila upp á það að gera. Auðvitað vill maður alltaf hafa framtíðina á hreinu, sérstaklega þegar maður er kominn með fjölskyldu, en ég held ég verði svolítið svalur og muni bíða og sjá hvað kemur upp."

„Auðvitað útiloka ég ekki að vera áfram hjá Horsens en eins og staðan er núna er líklegra að ég fari."

Kjartan stóð sig vel í landsliðsverkefni í Bandaríkjunum á dögunum og segist vera reglulega minntur á hvað sé í vændum í sumar. Gerir hann sér vonir um að vera í hópnum sem fer á HM?

„Mér finnst ég hafa nýtt þau tækifæri vel sem ég hef fengið með landsliðinu og ég hef verið að standa mig vel hjá Horsens. Við spilum eiginlega alveg nákvæmlega eins fótbolta og íslenska landsliðið. Ég hef ekki þurft að breyta leikstíl mínum neitt þegar ég hef farið með landsliðinu. Það hefur verið mjög gott. Ég tel mig þekkja þau hlutverk og prinsipp sem eru í gangi hjá landsliðinu."

„Ég vona það besta, ég er búinn að gera allt sem ég get. Það er undir Heimi og þjálfurunum að velja sinn besta hóp."

„Maður er alltaf minntur á þetta en það er svo veruleikafirrt að segja þetta upphátt. Auðvitað verður maður með fiðring í maganum 11. maí (þegar hópurinn er valinn). Maður stefnir auðvitað á að fara með, maður á að setja sér há markmið."

Kjartan er komin með sex mörk í dönsku úrvalsdeildinni á þessu tímabili en hann skoraði 14 í heildina á síðustu leiktíð. Hér að neðan má sjá myndband af mörkum hans upp á síðkastið.