Kristín Soffía Jónsdóttir, borgarfulltrúi Samfylkingarinnar, stingur upp á því að knattspyrnufélög í Reykjavík verði sameinuð í sparnaðarskyni. Viðskiptablaðið greinir frá þessu á vefsíðu sinni.
Kristín sagði í ræðu sinni á fundi borgarstjórnar að Reykjavíkurborg gæti sparað sér umtalsverða fjármuni ef lið í úrvalsdeild myndu sameinast, en verið var að ræða sex mánaða uppgjör Reykjavíkurborgar.
Sex knattspyrnufélög úr Reykjavík spila í Pepsi-deild karla og fjögur í Pepsi-deild kvenna. Nefndi Kristín í ræðu sinni að í Kaupmannahöfn væri einungis starfrækt eitt lið í efstu deild, FC København, þó að fleiri lið héldu úti yngri flokka starfi. Sagði hún að sameining þessara liða í efstu deild væri gerð í sparnaðarskyni.
Meðal ástæðna fyrir sameiningu félaga í Reykjavík nefndi Kristín að dýrt væri að reisa, reka og viðhalda stúkum og öðrum mannvirkjum fyrir sex knattspyrnufélög og að sá kostnaður gæti lækkað ef félögin sameinast.
Athugasemdir