„Við erum búnir að setja okkur ný markmið og þau eru að vinna riðilinn," segir Gylfi Þór Sigurðsson. Landsliðið undirbýr sig fyrir leik gegn Lettlandi á Laugardalsvelli sem fram fer á laugardag en Ísland hefur þegar tryggt sér sæti í lokakeppni EM.
Ísland vann 3-0 útisigur í Riga í fyrri umferðinni en þær tölur gefa ekki rétta mynd af leiknum. Fæðingin var erfið en Gylfi braut einmitt ísinn í þeim leik.
„Mér fannst þetta einn erfiðasti leikurinn sem við höfum spilað í þessum riðli. Þeir eru með það marga til baka og verjast á 10-11 mönnum. Þeir hafa ekki skorað mikið en fá heldur ekki mörg á sig."
Komin er út bók um Gylfa sem er sérstaklega kjörin fyrir yngri fótboltaiðkendur. Gylfi segir gaman að geta gefið af sér til aðdáenda með þessum hætti.
„Mér finnst það mjög gaman. Það tók um eitt ár að gera þessa bók svo þetta hefur verið mikil vinnsla en mér fannst þetta mjög gaman. Þetta er lifandi bók og mikið um staðreyndir og öðruvísi hluti sem fólk veit ekki af," segir Gylfi.
„Þegar ég var lítill var ég meira að skoða myndirnar. Það er mikið af myndum í þessari bók. "
Viðtalið má sjá í sjónvarpinu hér að ofan.
Athugasemdir