„Mér fannst við vera með þetta undir control mest allan leikinn. Fyrri hálfleikurinn var mjög fínn og yfir engu að kvarta. Við áttum góðar sóknir og vorum betri aðilinn. Í seinni hálfleik vantaði gæði í sendingum og þora að taka boltann fram á við."

„Það má ekki gleyma því að við erum að mæta góða liði. Það sýnir kannski hvað við erum langt komnir að við eigum að geta komið hingað og náð í stig. Mér fannst við eiga að gera það í dag. Þetta var þægilegur leikur að spila. Þeir sköpuðu lítið, það var helst í föstum leikatriðum á meðan að við fengum ekki alveg nógu mikið úr okkar föstu leikatriðum. Við vinnum þetta lið á heimavelli, það er ljóst."

Í upphafi síðari hálfleiks tóku miðverðirnir Kári og Ragnar Sigurðsson sprettinn fram völlinn eftir að miðjan var tekinn en boltinn kom þó ekki til þeirra.

„Við erum búnir að vinna svolítið með þetta í síðustu leikjum en boltinn kom ekki á réttan stað í þessum. Stundum gengur þetta ekki," sagði Kári.

Kári er bjartsýnn á að Ísland vinni Króatíu þegar liðin mætast á ný í júní. „Við ætlum að vinna þennan riðil. Við sjáum í þessum leik að við erum með alveg jafngott lið og þeir. Þó að þeir teljist vera eitt besta lið í heimi í dag þá eigum við í fullu tré við þá og mér finnst við eiga að geta unnið þetta lið."

Hér að ofan má sjá viðtalið í heild sinni.