Kristján Guðmundsson hefur framlengt samning sinn við Keflavík um eitt ár en hann er nú samningsbundinn félaginu út árið 2016.
Kristján gerði nýjan samning þar sem hann er nú komin í fullt starf sem þjálfari Keflavíkur. Kristján starfaði áður einnig sem fasteignasali en hann mun nú einbeita sér að þjálfunini.
,,Þetta snérist svolítið um breytingu á samningnum og því var ákveðið að bæta einu ári við. Við vorum að breyta vinnuumhverfinu og höfum áhuga á að stíga næstu skref. Við viljum ná meiri stöðugleika," sagði Kristján við Fótbolta.net í dag.
Keflvíkingar enduðu í 8. sæti í Pepsi-deildinni í sumar eftir að hafa verið í fallbaráttu fram í næstsíðustu umferð. Stefnan er sett hærra hjá Keflvíkingum næsta sumar.
,,Það verða breytingar á leikmannahópnum og vinnuumhverfinu eins og eðlilegt er. Við höfum áhuga að styrkja leikmannahópinn meira. Við þurfum að bæta í og leggja okkur aðeins meira fram til þess að reyna að ná í efstu liðin. "
Kristján tók aftur við Keflavík um mitt tímabil í fyrra eftir að hafa áður þjálfað Valsmenn í tvö ár. Hann þjálfaði einnig Keflavík frá 2006 til 2009 og varð bikarmeistari með liðinu.
Athugasemdir