Rúnar Alex og félagar eru í þriðja sæti dönsku deildarinnar með 58 stig úr 35 leikjum spiluðum.

Kjartan gerði Bröndby grikk
Nú fyrir stuttu var að ljúka Íslendingaslag þar sem Kjartan Henry Finnbogason fór á kostum.

Horsens fékk heimsókn frá Bröndby. Bæði Kjartan Henry og Hjörtur Hermannsson byrjuðu á bekknum. Kjartan Henry sat á bekknum hjá Horsens og Hjörtur hjá Bröndby.

Þegar leið á leikinn komu þeir inn á. Hjörtur kom inn á á 80. mínútu í stöðunni 2-0 fyrir Bröndby. Hann átti að hjálpa liðinu að landa sigrinum en tókst það ekki vegna þess að stuttu seinna kom Kjartan Henry ferskur inn á. Kjartan Henry gerði sér lítið fyrir og skoraði tvö mörk á síðustu mínútunum. Fyrra markið kom úr aukaspyrnu og það síðara eftir góðan einleik.

Kjartan Henry, sem er á förum frá Horsens eftir tímabilið, jafnaði þar með leikinn í 2-2.

Þetta eru hrikaleg úrslit fyrir Bröndby sem skerða möguleika liðsins á titlinum. Aðeins ein umferð er eftir af dönsku úrvalsdeildinni og er Bröndby nú tveimur stigum á eftir Midtjylland fyrir lokaumferðina. Stuðningsmenn Bröndby eru væntanlega ekkert að elska Kjartan Henry þessa stundina.

Horsens er í sjötta sæti og mun enda þar.

Midtjylland vann FCK Kaupmannahöfn á útivelli fyrr í dag, 2-0 og er sem fyrr segir með tveggja stiga forystu á toppnum fyrir lokaumferðina.

Midtjylland mætir Horsens í lokaumferðinni. Bröndby spilar við Álaborg.

Hvorki Kjartan né Hjörtur eru að fara á HM með íslenska landsliðinu.