Guðmundur Magnússon og félagar í Fram fara hörkuvel af stað í Inkasso-deildinni og unnu góðan heimasigur í kvöld.
Lestu um leikinn: Fram 3 - 0 Leiknir R.
„Þetta var fínt miðað við að við vorum ekki að spila alveg okkar besta leik. Það vantaði upp á hraðann í fyrri hálfleik. Þróunin á leiknum okkar frá því í fyrra er að við vinnum þó við séum að spila illa og skorum nóg af mörkum. Það er bara veisla," segir Guðmundur.
„Við erum þéttir fyrir og erum búnir að vinna vel í varnarleiknum. Atli í markinu er líka að stíga upp. Það er gleðin sem er að skila okkur þessu. Það eru allir rosalega glaðir. Svo erum við komnir með alvöru heimavöll loksins!"
Fram hefur verið að spila heimaleiki sína í Safamýrinni í upphafi móts og þar hefur myndast góð félagsstemning. Vilji langflestra Framara virðist vera að spila þar frekar en á Laugardalsvelli.
„Allir leikmennirnir vilja spila hérna nema Heiðar Geir. Hann vill fá graslyktina en við viljum búa til alvöru heimavallarstemningu. Allt annað að sjá áhorfendur þarna en þegar þeir eru eins og krækiber í helvíti á Laugardalsvelli. Það er líklegra að fólk úr hverfinu mæti þegar við spilum í Safamýri."
Sjáðu viðtalið í heild í sjónvarpinu hér að ofan.
Athugasemdir