Fótboltinn er þannig gerður að lífið í honum er ekki alltaf dans á rósum. Bekkjarseta og fall er fylgifiskur íþróttarinnar. Hér má sjá tíu einstaklinga í Pepsi-deild karla í sumar sem hafa átt erfitt tímabil.
Bjarni Guðjónsson - Rekinn úr þjálfarastól KR eftir afar dapurt gengi þrátt fyrir að miklu var til kostað. Margir settu spurningamerki við ráðningu Bjarna og það spurningamerki hvarf ekki.
Björgvin Stefánsson - Eftir að hafa raðað inn mörkum hjá Haukum í fyrra vermdi Björgvin varamannabekk Vals fyrri hluta sumars. Fór síðan á bekkinn hjá Þrótti. 1 mark í 14 leikjum í sumar.
Guðmundur Karl Guðmundsson - Var gerður að fyrirliða Fjölnis fyrir tímabilið en hefur mikið þurft að vera á bekknum. Rauk heim fyrr í sumar þegar hann var tekinn af velli.
Hermann Hreiðarsson - Maðurinn sem átti að rífa Fylki úr baslinu sem hefur verið undanfarin ár. Misheppnaðist algjörlega og liðið er í fallsæti þegar tvær umferðir eru eftir.
Ingvar Kale - Missti sæti sitt í marki Vals í hendurnar á óreyndum markverði. Fór síðan í frí út tímabilið. Verður samningslaus eftir tímabilið.
Jonathan Glenn (Breiðablik) - Raðaði inn mörkum í fyrra en sjálfstraustið verið týnt í sumar. Hefur mátt fylgjast með af varamannabekknum.
Sam Hewson - Hefur átt erfitt tímabil og verið inn og út úr liðinu. Var næstum farinn frá FH-ingum í glugganum. 10 leikir, 0 mörk.
Sito - Það efast enginn um hæfileika Spánverjans en honum hefur gengið mjög illa að sýna þá á vellinum í sumar. Það hefur þó birt til í síðustu leikjum hjá Sito.
Viktor Jónsson - Hefur alls ekki fundið skotskóna sem virkuðu svo vel með Þrótti í 1. deildinni í fyrra. Væntingarnar miklar en uppskeran aðeins eitt mark í deildinni.
Hólmbert Aron Friðjónsson - Gekk í gegnum mikla markaþurrð hjá KR-ingum og yfirgaf þá í glugganum. Skoraði tvö mörk í tapleik Stjörnunnar gegn FH en fleiri hafa mörkin ekki verið.
Athugasemdir
