Alli Jói.
Albi fékk sérstakt hrós frá þjálfaranum sínum.
„Hamingja, gleði, ánægður með strákana, við unnum fyrir þessum þremur stigum," sagði Aðalsteinn Jóhann Friðriksson, þjálfari Völsungs, eftir 1-3 sigur síns liðs gegn Þór í Boganum í kvöld.
Þór komst yfir í leiknum en Völsungur náði að snúa taflinu við fyrir leikhlé.
Þór komst yfir í leiknum en Völsungur náði að snúa taflinu við fyrir leikhlé.
Lestu um leikinn: Þór 1 - 3 Völsungur
„Við leyfðum okkur að vera ofan í baráttu og djöfulgangi. Við höfum mikið meiri gæði en fólk heldur held ég, og stundum meiri en við sjálfir leyfum okkur að trúa. Í þessum leik þurftum við að komast yfir aðra hluti áður en við gátum farið að sýna það og þá skein það líka í gegn."
Viðtalið í heild sinni má sjá í spilaranum efst.
Fyrirliði Völsungs, Arnar Pálmi Kristjánsson, kom Völsungi yfir með mjög góðu hægri fótar skoti þegar laus bolti féll vel fyrir hann utarlega í vítateig Þórsara.
„Það var bara frábært. Arnar er frábær leikmaður, átti ekki góðan dag síðast, en kom til baka hérna eins og alvöru fyrirliði gerir. Hann leiðir liðið oft meira í hlutum sem hann gerir heldur en segir og þetta var eitt af því."
Stemningin var í Boganum góð og var það aðallega vegna þess að Húsvíkingar í stúkunni, Græni herinn, lét vel í sér heyra. „Mér þykir vænt um þetta, er rosalega þakklátur þegar við náum þessu upp. Ég ætla vona að þetta sé eitthvað sem koma skal. Auðvitað þegar spilað er inni og fólk situr þétt þá heyrist meira. Ég er rosalega þakklátur fólkinu sem kom, söng og kallaði. Ég vona að þetta sé eitthvað sem koma skal."
Alli Jói er ánægður með stigasöfnunina en meðvitaður um að stutt sé búið af mótinu. „Við höfum ekki alveg fundið okkar besta hingað til, þetta var mögulega okkar besta frammistaða. Við höfum verið að slípa okkur saman."
Þjálfarinn var sérstaklega ánægður með frammistöðu Inigo Albizuri í hjarta varnarinnar. „Hafsentinn hjá mér, Albi, fannst mér framúrskarandi. Fyrst þú baðst um einn þá byrja ég þar, en ég gæti haldið áfram," sagði þjálfarinn.
Athugasemdir
