Napoli kaupir Goran Pandev (Staðfest)

Pandev var í láni hjá Napoli á leiktíðinni og hefur félagið ákveðið að virkja klásúlu í lánssamningnum og greiðir Inter 6,4 milljónir punda fyrir framherjann.



Makedóníumaðurinn lék 30 leiki fyrir Napoli í vetur og skoraði í þeim sex mörk. Hann er í skýjunum með að mál hans séu komin á hreint.



,,Ég er í sjöunda himni. Ég vildi vera áfram hjá Napoli eftir eitt ár þar sem mér leið sem heima hjá mér,\" sagði Pandev.



Pandev hjálpaði liðinu til sigurs í ítalska bikarnum, en það var fyrsti stóri titill Napoli í 22 ár. Hann vill byggja á því og vinna meira með félaginu í framtíðinni.



,,Ég trúi mikið á þetta verkefni og er sannfærður um að sigurinn í úrslitum bikarins sé byrjunin á frábæru tímabili hjá félaginu. Ég vonast til að geta endað ferilinn hjá Napoli,\" bætti Pandev við.